قصة مرة تجنن...اتمنى الكل يدخل

منقوله
للكاتبه :غيوووم الشووق

الجزء الأول
شعرها متناثر على عيونها و الدموع على خدودها شكلها روعه

ساره جالسه بزاوية في غرف من غرف المستشفى وما تبي تقعد على السرير وطول الوقت تبكي بحرارة

مابقى دكتور او ممرضه الا سألوها من أنتي وين اهلك ووين ساكنه وساره ماتقدر تنطق ولا بأي كلمه وحده وش تقول لهم وهي ما تذكر ولا شي
" اخذت ساره تسترجع الأحداث الي مرت فيها وكيف وصلت للمستشفى فاقت من الإغماء ولقت نفسها مرميه على حفنة تراب وصارت تمشي واتضح لها الأنوار من بعيد أنوار الطريق وصلت ولقت ناس يصلون على جنب الطريق كانت عائله مصريه من أب وزوجته وعيالهم جايين من الشرقيه للرياض شافتهم ساره وراحت تبكي تبيهم يساعدونها الاب خاف شاف فتاه تحمل جمال غير طبيعي وعبايتها شبه مقطعه وجهها عليه غبار اسود
خاف احمد من تحمل المسئولية وسألها من وين جايه لكن ساره ما تذكر شي ورفض يشيلها ويوديها معاهم
وزوجته تناظرها وتترجاه بس احمد مصر على راية ورافض يشيلها يا بنت الناس دي حتسبب لينا مشكله حنا في غنى عنها هنا اغمى على ساره وماقدر احمد الا ان يوصل ساره لمستشفى العسكري بالرياض وباقي الأحداث تعرفونها "

راحت الأيام ورجعت لساره عافيتها كما سمتها ام محمد هذي " أمراه كريمه دائما تزور المستشفى وتنفق على المرضى ماجا عليها اولاد لانها كانت عقيم شافت ساره ورحمتها من كثر بكاءها وحالتها الي تقطع القلب فطلبت ام محمد من إدارة المستشفى ان ساره تعيش معها الى ان يأتي احد يسأل عنها

ام محمد تعيش بفله كبيره هي وزوجها عبد العزيز رفض ان يتزوج عليها رغم محاولاتها تزويجه ودايم تلح عليه يتزوج لكنه
رافض حتى التفكير بالزواج ويقول انتي يام محمد عندي بالدنيا كلها ما تصور لي زوجه غيرك "


.................................................. ........................................
ام محمد : تعالي يمه ساره ادخلي لا تستحين الحين البيت بيتك من اليوم واعتبري نفسك فيه راعية محل وحنا ضيوفك

ساره وهي تمشي وحامله هم الدنيا على راسها : تسلمين ياعمتي مدري وش اقولك او وش اسوووي وقعدت تبكي
ام محمد والدموع في عينها : ساره الدموع هذي مابي اشوفها من اليوم ورايح ابي بدالها الضحكه ماتفارق شفايفك والله يوفقك يابنيتي ويسعدك

ساره وهي منهارة وتصيح :صعب يا عمتي صعب اني اضحك ابتسم افرح وانا مدري منو انا وين اهلي بس احمل اسم حتى مو اسمي الحقيقي وين ابوي وين امي وش الي وصلني للوضع هذا وتبيني ياعمتي اضحك كيف اضحك كيف اقدر اشوف الناس أذا سألوني منو انتي وين اهلك صدقيني ياعمتي صعب لكن ما اقول الا الله يقدرني على رضاك ياعمتي ولا تشووفين مني ماتكرهينه ان شاءلله وضمت ام محمد وجلست تبكي وتبكي ام محمد معها
ام محمد تواسيها : اسمعي يا بنتي الدنيا مليانه هموم همك ارحم من هم غيرك شوفي الي حولك وراح تدرين ان ربي راضي عليك سخر الي حولك لك المصايب في الدنيا كثيره غيرك مو لاقي بيت يحتويه اكثري من الحمد يابنيتي والاستغفار وبتشووفين النتيجة بأذن الله

ام محمد : ميري ميري تعالي يمه ودي ساره لدارها خليها ترتاح وانتي ياساره اذا اذن العصر تجهزي ترى بوديك لسوق تشترين الي ناقصك

ساره مفتشله من كرم ام محمد : ماتقصرين ياعمتي ماخليتي شي الا وجبتيه لي مدري شلوون اشكرك

اكتفت ام محمد ببتسامه دائما تشعر من امامها بالخجل من كرمها

راحوا للسوق واشترت كل نواقصها ماخلت شي الا وشرته حتى الله يكرمكم الشباشب
ودتها لغرفتها ورتبت كل اغراضها وجلست على السرير ترتاح من تعب السووق وقعدت تحاول تتذكر لكن ماقدرت يارب مدري امي عايشه لو كانت عايشه هي مثل ام محمد بحنيتها وكرمها وابوي وش يسووي الحين انا لي اخوان او لا وقعدت تبكي صعب على الانسان يعيش مجهول الهويه مايتذكر وش اسمه كيف تربى وش ماضيه اشياء تدور في راس ساره تحاول تدور لها حل


طق طق طق دشي

ساره تتوضى في حمامها تبي تصلي المغرب جتها ام محمد :

يابنتي بكره ترى عزمت خواتي وعيالهم ابيك تتعرفين عليهم وتستانسين مع البنات
ساره انحرجت كيف تستقبلهم ماتدري راح يتقبلونها او لا : ابشري ياعمتي بالي يسرك

ام محمد لها ثلاث خوات واخووين

خواتها الجوهره الكبيره والكل يحترمها وعيالها سعود الكبير وعمره 27 سنه وماتزوج انسان جدي راعي شغل ماعنده وقت للحب ولا للخرابيط على قولته يشتغل مدير في شركه من شركات ابو محمد وماسكها وبعدين اخوه عبدالله عمره 25 هذا دمه خفيف يموت في شي اسمه كووره موته الهلال وياويل احد يقول فيه كلمه مخلص جامعه قسم محاسبه ولا لقى وظيفه ماغير سهر ونوم ريم اختهم الوحيدة عمرها 22 تموت في شي اسمه كتاب دايم تحب تتهاوش مع اخوها عبدالله اذا تبي تقهره تسب الهلال وهات ياهواش واذا جا سعود يسمونه هادم اللذات ومفرق الجماعات تلاقيهم هادين ويتهامسون همس " طبعا مسمينه كذا لانه مايخليهم يسهرون ولا يشوفون التلفزيون لوقت متأخر " بس ريم تموت عليه وتدلع عليه كأنه ابوها الي توفى من يوم ماكانت صغيره ولا شافت الا سعود قدامها رباها ومايحب يشووف دموعها دايم يقول دمعتك ياريم غاليه مابي اشوفها

صيته هذي اخت ام محمد الثانية لها بنتين وولدين غاليه اكبر بناتها وعمرها 26 ومتزوجة وعندها ولدين تؤم راكان وريان عايشه مع زوجها بجده واهلها بالرياض

بعدها مها عمرها 22 صديقة ريم وتموت فيها ودايم مع بعض ابد ماعمرهم شافو مها بدون ريم ولا ريم بدون مها مها انسانه حساسه تحب الشعر تموت في شي اسمه عبدالله ودايم تسئل ريم عنه وهو مايدري انها تحبه



خالد عمره 24 سنه خطيب دانه بنت خالته نوره مايعرف أي شي عن دانه الا انها بنت خالته وتدرس ادب انجليزي سنه ثالث

ماجد 22 هذا مطفوووق يحب شي اسمه هجوله وتفحيط سيارته عليها علامات تحدي سيارته يغبرها دايم

نوره اخت ام محمد الثالثه عندها تركي عمره 27 وصديق سعود الروح بالروح ونفس افكارة

ودانه عمرها 23 خطيبت خالد

أخوان أم محمد سعيد وهو الكبير وعياله طلال وعمره 27 مغرور وشايف نفسه الى ابعد حد ويموت في شي اسمه بنات ينسى نفسه اذا شاف عبايه سودا لكن علاقاته مختصره على التلفون بس
فهد 25 ملتزم هادئ داعية
روان عمرها 19 تموت في شي اسمه كوره دايم صور الاعبين معلقه بغرفتها ويموت فيها ابوها وااوامرها مطاعه عنده دايم اهي وماجد يتطاقوون من كانو بزران

اخو ام محمد الثاني عادل توفى وهو صغير وموته اثر على سعود وتركي لأنة صديقهم وصارو يكرهون شي اسمه تطعيس لانه مات وهو متحاد مع ولد جيرانهم

الجزء الثاني

يمه يمه ووووووووووينك
لبيه يمه سعود وش بغيت

سعود : يمه الملف الازرق الي على درج مكتبي من الي ماخذه مايدخل مكتبي الا انتي او الشغاله اكيد عندك خبر عنه
ام سعود : أي هذا يمك جا ابو محمد وخذاه الصبح وانت نايم وقال محتاجه ضروري وان عنده سفر وقال ان ام محمد عازمتنا اليوم نجي عندها تبي تعرفنا بضيفه جايتها
سعود : اشوى الحمدلله والله يايمه ان في الملف معامله مهمه لزبون لو ضاع كان ضاعت وظيفتي
او سعود : بسم الله عليك يمه
سعود : وش الضيفة الي عند خالتي يمه
ام سعود : هذي تقول ابنيه مسكينه فاقده اذاكره وماتدري وين اهلها لقوها ناس تمشي على طريق الشرقيه للرياض ماعليها غير ملابسها وماتذكر أي شي وماغير تبكي
سعود : يالله المستعان دايم خالتي قلبها كبير مع ان ربي مارزقها عيال الا انها تحب الجميع وكنهم عيالها هاه يمه تبين شي قبل لا اطلع

ام سعود : لا يمه رووح جعل ربي يستر عليك ويوفقك ويخليك لي يارب

ابتسم سعود دايم هذي دعوات امه تشعره بسعاده ويحس انها وجه خير عليه

ريم : صباح الخير يمه وتجي وتحب راس امها
ام سعود : صباح النور هلا وغلا بالريم ينشرح صدري يابنيتي اذا شفتك
تقوم ريم وتحضن امها ياعلني ماخلى منك يمه وياعل عيني ماتبكيك قولي امين قومي يمه عني هههههههههههههههه ذبحتيني
عبدالله جاااااااااي مسرع ويسحب ريم من رجلينها وهي تصيح ويقوول ابعدي عن امي يالدبه بتكسرين اضلوعها خليها ترانا نبيها
ريم : وجعن يوجعك يالدب ذبحتني يمه شووفيه كسرني اهي اهي دموع التماسيح
امهم تضحك على خبال عيالها

عبدالله : يجي ويحب راس امه ويقول ياعلني مانحرم من ذا الشوفه يارب ريم قومي جيبي فطووري

ريم وتحط يديها على خصرها: ياسلاااااام شغالتك وانا مدري

يقوم عبدالله ويلف يدها على ورى ها بتروحين ا و لا وريم تصيييييييييح يمه تعالي بيذبحني وامها تقول طيعي اخوك وليش ماتجبين له الفطوور

راحت ريم للمطبخ وهي مقهورة وقالت للشغاله تسووي فطور لعبدالله وجابته له في صنيه وقالت اطفح جعلك تغص
عبدالله : خخخخخخخخخخخخخخخ تعالي افطري معي عشان نغص جميع

ريم : اذلف عن وجهي ترى مالي خلقك
ام سعود : ريم يمه ترى خالتك عندها ضيفه وعزمتنا الليله نجيها
ريم : ومنو الضيفة يمه وين عرفتها خالتي
عبدالله : شوي شووي على امي حشا بالعه راديو انتي
ريم : انت يالدعله من كلمك هاه اعرف الرجال الي يتكلم في كلام حريم يسمونه نسونجي
عبدالله : الظاهر انتي ماراح تسكتين الا اذا قمت عليك
ريم نطت ورى امها: تعال اذا فيك خيييييييير
ام سعود : ابد انتو ماتحترموني ماتستحوون كني مانيب جالسه بينكم

عبدالله وريم راحو وحبو راس امهم العذر والسموحه يمه بس بنتك هاذي تطفر بالواحد
ريم : لا والله مو كنك الي تدخل عصك في الي مايخصك
ام سعود : مسكت راسها لااااااااحول الله بلاني بعيال مهابيل



مها : يمه وش رايك التيور الوردي ولا الاورنج البسه الليلة
ام خالد : كلها يايمه زينه البسي الي يريحك
مها : شكلي بتصل على رييييم واسئلها

رن رن رن
مها : الووووو
عبدلله كان جنب التلفون وشاله وهو كان الرجال يغني: سلمولي على الي سل حالي فراقه احم احم هلاااااا والله

مها عرفت صوته ومانطقت وبدى نفسها يضيق وحست بحراره فضيعه :
عبدالله : الوووووووووووو ياحووول
مها يالله جمعت نفسها ونطقت : ريم موجوده
عبدالله : بالله تبين ريم أقول يا الأخت ماتعرفين تسلمين قبل
عبدالله : وجع سكرت التلفون في وجهي انا وريها هذي اكيد مها بنت خالتي مايحب ويكلم ريم غيرها اشووف الرقم في الكاشف

ويرجع ويتصل ويقلد صوت مراه يتصل طبعا من جواله الووووو
مها كانت جنب التلفون ردت : اهلين
عبدالله بصووت ناعم : منو معاااي
مها : احلفي ياشيخه مو انتي المتصله المفرووض تسلمين اول شي
عبدالله ونسى نفسه وتكلم بلهجته: علمي نفسك
مها : هاه
عبدالله رجع ينعم صوته : لا ابد فيني زكااام وصوتي يجي ويرووح هذا مو بيت ....
مها : لا غلطانه اختي
عبدالله ويرجع صوته زي ما كان : يلا مع السلامه اجل سلمي على خالتي وثاني مره سلمي اذا كلمتي ناس السلااام لله
مها : وجها صار طماطه وانقلب اشارة مرور هذا عبدالله ياويل حالي وش هببت وقلت له

راحت لريم واتصلت عليها ريم تسمع جوالها يرن
ريم : الووووو
مها : ريييييييييييييييييييييييي يييم الحقيييييييييي علي
ريم : بسم الله عليك مها وش فيك
مها : عبدالله ذبحني ولا سما علي
ريم : مها اقول تقلعي الحين انا قاعده اجهز للعزيمه وانتي تقولين ذبحك وش سوى غضنفر زمانه
مها : حرام عليك ريم لاتقووولين عنه شي وربي امووت في هالانسان انا يوم اسمع كلامه ماعاد اقدر اتحرك ولا اتنفس شلوون اذا شفته
ريم : تبيني اقوله انك تحبينه
مها : ياويلك ياريم اذا نطقتي وربي ماعاد تشووفين وجهي في بيتكم ليوم الدين ولا ارضى عليك مستحيل مستحيل ياريم ابين حبي له او اقول له
ريم : اذا قعدتي على هالحاله مراح يدري
مها : راضيه وقعدت تصيح " مها انسانه حساسه والحب لاعب في حسبتها "

ريم : تبكين عشان عبدالله مها حرام عليك اذا الله رايد يجمعكم راح تجتمعون واذا ما اراد والله لو كان يحبك وتحبينه والكل يتمنى جمعاكم مراح تجتمعون


.................................................. ............

ساره راحت تشوف الأشياء الي شرتها لها أم محمد احتارت تلبس شي رسمي : ياربي محتاره وش اسووي الحين اسئل عمتي اخاف تتضايق مني بروح واسئلها وامري على الله

ساره تتقدم وهي مترددة : عمتي

ام محمد وهي تشرب القهوة العربية الي ما تستغني عنها ولازم في الصباح تأخذ على الأقل اربع فناجيل منها مع التمر طبعا : هلا يمه تعالي وش تبين

ساره وهي مستحيه ومدنقه راسها للأرض : عمتي انا محتاره وش البس اليوم فتحت الدولاب واحترت اكثر

ام محمد وهي تفز واقفه : تعالي معي يمه
فتحت ام محمد دولابها واختارت لها تنوره فيروزي بقصه حلوه فيها دقات بالزيتي على القصة وبلوزه زيتي غامق ساده
ام محمد وهي تبتسم لساره : الباقي عاد يابنيتي ماعندي خبره فيه اختاري انتي الكسسوار والمكياج
ساره وهي تضحك : ابشري يا عمتي
خذت حزام زيتي رووعه من الجلد عريض شووي ولبست عقد على هيئة أحجار غريبه حبه زيتي غامق وحبه افتح منه شووي وحلق ناعم مره
جا دور شعرها طبعا ساره شعرها حرير مايحتاج استشوار مو طوويل مره ولا قصير يجي عند الخصر قالت لازم اسوي فيه حركه ما حبه يكون طايح كذا
جابت بنس وصارت تحط جل شوي ومويه وتلفف اطرافه من تحت ببنس جا دور مكياجها وهي بيضاء مره مايحتاج تحط كريم اساس كثير حطت بودرة خفيفة وكحلت عيونها من جوى بخضر وحطت شدوو خفيف زيتي واحمر خدود وروج هاديء جدا يميل للحمي يمكن الي حولها يشوف لمعه بدون لون لبست لبسها وفكت شعرها وانبسطت على ذوق عمتها وكيف طلع شكلها تحفه وارتاحت نفسيتها " طبعا الأنسان اذا كان راضي على لبسه راح يستانس ويرتاح وياخذ راحته بالسوالف هذا عني انا مدري عنكم "

وصلت ام سعود وبنتها والي موصلهم طبعا سعود
" معلومه مهمه السواقين من الأشياء الممنوعه عندهم مو بس سعود كل العائلة تركي وخالد وخالهم سعيد "

ريم وهي تشيل النقاب : يممممممممممه منيرة " هذا اسم ام محمد "

ام سعود وهي معصبه على تصرفات بنتها : متى بتعقلين وتنسين حركات البزران

ريم وهي ميته ضحك : مراح انسى لازم يدرون ان الشيخه ريم وصلت

ام محمد وهي ترحب وتهلي : ياهلااا والله بشيختنا وبنيتنا ريم

ريم بسرعه تسبق أمها تبي تضم ام محمد : امووووووووح على احلا خاله بالدنيا


ام سعود: شلونتس ياوخيتي بشريني عنتس
ام محمد وهي تحب راس ام سعود لأنها اكبرهم : بخير بشوفتكم والله ياختي اذا شفتكم كني ملكت العالم كله
ريم وهي تتكلم بشويش : خالتي وين البنية ما شفتها
ام محمد وهي تضحك على بنت اختها وفضولها : ساره بتجي بعد شوي قاعده تتزين يمه
ساره اقبلت عليهم وهي تحس بحرارة وارتجاف اطرافها تحاول تصير طبيعيه بس الحيا ذابحها ويالله انطقت: السلااااااام عليكم
الكل : وعليكم السلاااام
ساره وتجي لام سعود وتحبها على راسها : شلونك خالتي
ريم تفز واقفة: هلا وغلا هلا ومرحبا بصديقتنا الجديدة يامرحبا بطش والرش والبيض المفقش خخخ
ساره وهي تضحك وتحس بالراحه : والبقاااا الله يسلمك ياعمري
ريم وهي تشقق من الضحك : انا الشيخه ريم وهذي امي الجوهره ام سعود

ساره وفعلا حست كنها بين اهلها : والنعم والله

ام سعود واعجبها أدب ساره : تعالي يمه اجلسي ارتاحي لا تأثر عليك الخبله ريم وتصيرين مرجوجه مثلها

الكل مات ضحك على شكل ريم وهي تصتنع البكي

ريم اهي اهي : الله يسامحك يمه انا خبله وش رايك يمه منيره

ام محمد وهي تضحك : انتي احلا خبله في الوجود

ريم وهي تفتح ثمها : حتى انتي يمه ابيك عون صرتي فرعوون

انا اصير لك فرعون وعون امري امر مها وهي تشيل النقاب عن وجهها : مساء الخير على الناس الحلوين
مها تحب راس خالاتها : وش خبار عجزنا
ريم :خخخخخخخخخخخخ عجز حدك عاد امي احلى صبيه اذا امك عجوز بكيفتس
تجي صيته اخت ام محمد الثانية : أي والله عجزنا شوفيني يالله رقيت ثلاث درجات وراح نفسي
قاموا الكل يسلمون على صيته
ريم تجر يد مها : اعرفك على صديقتي الجديدة ساره الي بتحل مكانك هههههههههه
مها واعجبتها هدوء ساره وجمالها : مرحبتين السوري وش أخبارك بشريني عنك
ساره وهي تشوف كيف عائله على غناهم الا ان نفوسهم طيبه : بخير الله يسلمك
اعجبوا الحريم بساره وكيف انها ما تتكلم كثير وطول الوقت بس تبتسم على خبال ريم ومها
صيته وهي تسأل اختها منيره : اهل سعيد وينهم ماعزمتيهم
ام محمد : الا بس تعذروا يقولون معزومين عند خوالهم
جت نوره وبنتها دانه
مها وريم بنفس الوقت : دانــــــــــــــــــــــ ـــــــــــــــه صرصور انتبهي
دانه تنط فوق الكرسي : يمه تكفين الحقي علي
مها وريم ميتات ضحك على شكل دانه
دانه بعد ماستوعبت انه مقلب: لا بارك الله فيكن قولن امين فشلتني عند الضيفة ماعليش اختي تراني بنت عاقله وراكده ماعليك من طفاقتي قبل شووي
ساره وهي تبتسم : ولا يهمك الكتاب واضح من عنوانه
دانه وهي تقلب عيونها : وش تقصدين
ساره بضحكه : قصدي الادب والذرابه واضحه
مها وريم بضحك : أي لان نيتها شينه دانوه شكت انك تسبينها
دانه بفشله واضحه على وجهها : لا والله بس قلت يمكن البنت فهمتني غلط ودرت اني مخفه بنت خالة مخفات
ضحكو الحريم على سوالف البنات الي ماتخلص
صرخت رييييييييييييييييييييييم : بنااااااااااااااااااااااا ااات
مها : سمييييييييييييييييييييييي يييييييييييييي يابعد من قعد ومن مشى على الأرض
دانه وهي تشرب قهوه : والله من الهلاس يا مها
ساره منبسطه على حركات البنات وضحكهم
ريم : وش رايكم نطلع للبر الخميس الجاي قولوا تم والطلعه على حساب اخوي سعود
ام محمد وهي تضحك : كريم من مال غيره
ريم : تكفين ياخالتي قولي للعيال انتي مراح يرفضون طلبك ولا انا حسرة علي لو يدري عبدالله اني راعي العزيمة علقني في المروحة وشغلها على واحد عشان اتوب
مها: خالتي الجوهره تكفين نبي تسووين لنا جريش من ايديك الحلووه اذا طلعنا للبر " الجوهره معروفه بزين طبخها خاصه في الكلات الشعبيه "
ام سعود : ابشري يا مها من عيوني

الجزء الثالث
طلال جاي معصب ويصرخ : رووووووووووووووووان وووووجع
روان معليه صوت التلفزيووون وتاكل بطاطس ليز ولا حد همها حطته على السايلنت وببرودة اعصاب : امر بغيت شي
طلال وداري ان وراها سند قوي : الحين انا مو مار عليك العصر وقايلك عطي شماغي الشغاله وخليها تكويه زين وخاصه المرزام
روان وتوها تتذكر أنها ما قالت للشغاله : اوووه يابو الشباب والله اني نسيت
طلال : انا بوريك كيف ماتنسين مره ثانيه
تنط روان وترمي الريموت وتنحاااش للحوش لبوها وامها كانوا جالسين هناك
روان : تكفىىىىىىى يايبه الفزعه
ابوها وميت ضحك : ابشري بعزك
ام طلال وهي منقهره من بنتها : اكيد انها مسويتن لها مشكله
طلال ومعه خزرانه : وقسم بالله ماخليك ياروان اخرتيني على الشباب
ابو طلال وهو يضحك : والله ما تلمس شعره من راسها
طلال وهو يجلس على المركى : يعني بتقعدين طول عمرك ورى ظهر ابوي
روان وهي ترفع حواجبها تقهر طلال
طلال : يبه طالبك قول تم
ابو طلال وهو يستقعد : تم
طلال وهو يناظر روان بتحدي : تزوج روان ماجد عشان يطلع الشيب براسها
ام طلال : لا بارك الله في شياطينك يا طلال تخطب لاختك
ابو طلال : خخخخخخخخخخخخخ من حظها اذا ماجد فكر يخطبها
روان : قسم بالله لاقتله واقتل عمري وراه من زين خشته اوافق عليه
ابو طلال : عيب ياروان هذا ولد عمتك وش انتي شايفه عليه
روان : تصدق يبه رفض ذاك اليوم يطعس بنا
طلال ويرفع يديه للسماء: يالله يارب لك الحمد الله بلانا بأخت كنها رجال يالله يبه استاذنك بروح لخوياي
ابو طلال الله معك يابوك ولا تاخرون لاخر الليل تعالوا امسوا بدري
طلال : ان شاءلله يبه" طلال على جماله وغروره الا انه بار في ابوه وامه "

ابو طلال وهو يستانس على سوالف روان : كملي وش سويتي طيب
روان وهي تفز وتجلس جنب ابوها وتتمركى جنبه : اسمع ياطويل العمر قمت خذيت مفتاح السياره ورميته في حوض المويه حق الابل عشان يتوب مره ثانيه يطردني
ابو طلال ميت ضحك على سوالف بنته : وش سوى ماجد
روان وهي تتذكر السالفه وشوي بتصيح : ركب البنات كلهم على فكسار ابو محمد وراحوا يطعسون يوم جيت وقلت لطلال عشان يقهره ويوديني قال اقلبي وجهك من قالك توقفين في وجه ماجد شفت يبه اعيالك
ابو طلال وهو يبتسم : وش في عيالي
روان وشوي بتبكي: واحد مغرور ويقهر وراعي أموار شيلي حطي واحد لا تطلعين من البيت الا بقفازات بشراب تغطي زين لا تسمعين اغاني وش تبين في التلفزيون
مليت ليت لي اخت قالتها وهي تدمع عيونها
ابو طلال : يابنتي البنت تحترم اخوانها الي اكبر منها وفهد اذا امرك بالستر فلأنه يحبك يابنتي البنت المحتشمه المتستره محد يمسها لا بكلمه ولا غيره والكل يحترمها ويقدرها اما الي تبين زينها حتى لونهم ينعجبون بها الا انهم ما يتمنون خواتهم مثلها
روان وبملل : يبه انا ابي اروح لبنات عماتي مليت من الجلسه بروحي
ابو طلال خلاص تجهزي وانا بنفسي اوديك
روان : تحب خشم ابوها جعلني ما اذوق حزنك يبه
ابو طلال يبتسم لبنته الي مهما كبرت تبقى في عينه بنته الصغيره وكل اوامرها مجابه
" روان قاصه شعرها فراولى يجي لتحت اكتافها بشوووي اعيونها فيها بريق مميزها خاصه ان لونها اخضر شي استغربوه العائله لان مافيهم احد لون عيونه بنفس لون عيون روان خشمها صغير لها غمازتين تجنن تظهر اذا عصبت و ضحكت الكل يموت فيها ابتسامتها جذابه بشكل "
البست روان بسررررعه دايم تحب تلبس لبس هادي وما تحط مكياج ابد بس تموت في شي اسمه قصات شعر تلاقينها كل يوم قصه جديدة
روان تكلم ريم : الووووو ريموه اخبارك يالدبه
ريم وهي تضحك وتحط الجوال على السبيكر بينها وبين مها :هلا وغلااا بروان ام غمازات
روان : خخخخخخخخخخخ وينك فيه انا زهقانه وبجيكم
مها بصوت عالي : تعالي عندنا ضيفه بنعرفك عليها
روان : جايتكم على طووووووووووووووول يلا باااي وسكرت التلفون بدون ماتسمع كلمة بااي وطيحت وجه مها وريم ميته ضحك عليها
مها : اقول اقلبي وجهك خلينا نكلم امي منيره تخلي ساره تجينا
" ريم دقت على جوال ام محمد وقالت لها ام محمد ترسل لهم ماجد يجيبهم لانهم طبعا مانعين السواقين "
ريم : مها قولي لخوك ماجد يجيب امي منيره وساره
مها : اوكي ثواني بس
ماجد كان يتفرج على المبارة ومتحمس : شووت الله ياخذك وياخذ من جابك لنادينا
مها وهي تتقدم شوي شوي وخايفه تكلمه وتقطع عليه : احم ماجد
ماجد وماهو يمها يشووف هجمة لصالح فريقه ويسدد هدف: هددددددددددددددددددددف ايوىىىىىىىىىىى
ويوقف ويقعد يرقص ويجي يم مها ويبوسها ويمط شعرها
مها : عمى يعميك شعري حسبي الله عليك قاعده احط عليه من الخلطات ابيه يطوول وانت قطعته
ماجد وهو ميت ضحك على شكل مها وشعرها انتفش : وش تبين لا تقولين جب لنا شاورما لو تحبين كوعك ما جبت لكم
مها وهي تزم فمها وترفع حواجبها : مالت عليك مابي شي منك الله يخلي لي خالد قوم امي منيره تبيك تجيها تجيبها لنا
ماجد : امي منيره تبشر بس بعد الشوط الاول
مها : اهم شي اني قلت لك
ماجد ولا رد عليها مندمج مع المباراة

وروان تدخل وهي تشل وتغني : كان الصدق ياعرب عند العرب واجب طالب عليكم طلب لازم تلبوووووووونه
ماجد انتبه لصوت روان فز واقف وجا بسرعه يمها : انتي بتقطعين رزقه اذا انتي بتغنين له ماعاد راح يلقى له جمهور الكل بيترك اغانيه
روان وهي منصدمه ومنفشله بنفس الوقت ناظرته من فوق لتحت واشرت بيدها : روح روح عني
ماجد وتعمد يقهرها وقف قدامها بحيث انها ماتقدر تروح للبنات
روان تصك على اسنانها من القهر وتتلفت يمين وشمال كنها تبي تدور شي تضربه به
ماجد وهو مستانس ويضحك فريقه وفايز وقاهر روان اجتمعت
دخلت روان يدها لشنطه وطلعت عطرها بسرعه وبختها على عيون ماجد
ماجد : اااااااااااااااااي لا بارك الله فيك وراح بسرعه للمغاسل يغسل عيونه
وروان على الدرج تبي تشوف وش صار عليه انتابها خوف من الي سوته ومتاكده ان ماجد مراح يعديها لها
ماجد رجع يبي ياخذ مفتاح السياره وعيونه صارت حمر شافها على الدرج
: روان قسم بالله لا طلعها من عيونك اصبري علي وربي لاخذك واطفرك انا مقدر امسكك الحين انتي مو محرم لي لكن قسم بالله محد يتزوجك غيري
روان وهي معصبه وتحط يدينها على خصرها : دا بعدك اذا لمست النجوم ذيك الساعه تزوجتني ياباشا
ماجد وهو يضحك ويحرك حواجبه درى بنقطة ضعفها : نشووف ياروانوه نشووف وطلع وهو يضحك
روان تكلم نفسها : والله ما اتزوجه لو كان اخر رجال بالعالم خير وش شايفني ماعندي ابو
مها : بوووووووووووووووووو
روان : وتجلس على الارض من الخلعه وبنفس الوقت من الزعل من كلام ماجد وتبكي
مها تضمها : بسم الله عليك اسفه مادريت انك بتخافين ليش تبكين وش فيك قومي قومي غسلي وجهك
روان وهي على نفس جلستها : مها صدق ماجد يبي يتزوجني ويطفر بي
مها :هههههههههههههههههههههههه� �هههههههههههههههههههههههه ه
روان وتناظر مها ببلاهة : وش فيك
مها : قومي مالت عليك وعلى ماجد توكم بزران تكلمون بالعرس انا اكبر منك بسنتين مدري ثلاث ما فكرت
روان وهي تبرر لمها : اسمعي ياخبله اهو من شووي " وقعدت روان تقص لمها كل الي استوى لها من شوي مع ماجد "
مها : يابنت الناس هذا بعلم الغيب وهذا شي بدرري لا تفكرين وتقهرين نفسك اهو يبي يطفرك امشي بس ريم تحترينا

.................................................. .............................................
وصل ماجد لبيت خالته ام محمد وضرب هرن عليهم عشان يطلعون عليه

ام محمد بمشيتها الهادية تفتح باب السيارة : السلام عليكم
ماجد يحب خشم خالته: وعليكم السلام هلا خالتي وش حالك بشريني عنك
ام محمد : بخير يمال الخير
"ساره بهدوء ركبت ورى ولا أحد حس فيها " بس ماجد انتبه لها من المرايه الأمامية
قرب ماجد من خالته وهمس لها خاله خلي ضيفتك تعطي روان من أدبها شوي
ام محمد وماقدرت تمسك ضحكتها :هههههههههههههههههههههههه� � ياولدي روان بزر ترد عقلك لها
ماجد وهو يبتسم : لونك ياخالتي شايفه وش سوت فيني قبل شوي ماقلتي بزر
ام محمد وتناظر لماجد بمعنى كمل وش سوت فيك
ماجد : تصدقين ياخالتي انها رشت علي عطر في عيوني
ساره ماقدرت تمسك نفسها فطلعت ضحكتها طالعها ماجد من المرايه وابتسم
ساره تفشلت وتمنت الارض تنشق وتبلعها
ماجد يبي يبعد عن ساره الأحراج : خالتي ماقلتي وش اسم بنتك " كلمة بنتك هزت ام محمد وحست فعلا كن ساره بنتها الي ما جابتها " : اسمها ساره يمه
ماجد : العذر والسموحه ياساره واعتبريني اخوك الصغير متى ماتبين أي خدمه اطلبي من امي منيره وابشري بالي يسرك
ساره وهي تحاول يطلع صوتها : تسلم ما تقصر
.................................................. .................................................
" البنات مسوين مفاجأة لساره عشان يبعدون منها الإحراج وتكون وحدة منهم ولا تستحي "
ريم : بنات خلونا نفكر في فكره نخلي ساره ما عاد تنحرج منا
روان وهي تقضم اضافرها : انا عندي فكره تهبل
مها وريم بنفس الوقت : وووووووووش هي
" وقالت روان لمها وريم فكرتها "
اتفقوا البنات يجلسون بالحديقة وسو لهم جلسه أرضيه افرشوا فرشة في الأرض وجابت مها القهوة والشاهي والحلا إلي مسويته وكان الجو فيه نسمة هواء مع ريحة الثيل ورطوبته عطت جو خيال وخاصة جمعت بنات ما تخلا من الفر فشه والضحك
أقبلت عليهم ساره مشاءلله شكلها كان رووعه بسمتها جذآآآبه وبهدوءها المعتاد : السلااااااااام عليكم ورحمة الله وبركاته
البنات كلهن :وعليكم السلااااام
ريم وهي تسلم على ساره: هلا وغلااااااااا بسوووووير
مها : بيتنا اليوم زاد نوره وش اخبارك ساره
ساره : الحمد لله بخير وش اخباركم أنتو
البنات : الحمد لله بشوفتك منيحيين
" أقبلت عليهم عجوز تمشي ومعها عصى وتتكي عليها البنات خافوا "
ريم : من ذي يا مها
مها وهي توقف وتركض : هذي عجوز مخرفة تلحق البزران
البنات صاروا يركضون والعجووز شوي تركض وراهم
ريم وهي تبكي : يمممممممممممممه الحقي علينا
مها : ساااااااااااره انتي لابسه وردي ترى اهي تموت في ذا اللون
ساره : تكفيييين يامها وربي مقدر اركض زيادة بمووووت
والعجوز الى الآن تركض
ساره وتعبت وما قدرت تكمل: أمحق عجووز ما أسرعها
شوووي والعجووز تجي ساره وخلاص ساره جلست وقعدت تشووفها وتصرخ بأعلى صوتها
وتطيح العجووزعلى الأرض من الضحك وتشيل الغطا عن وجها وطلعت روان
وجلسووا البنات يضحكون على شكل ساره
ريم : سوير وش رايك في المقلب
روان وتمد يدها وتسلم على ساره : معك روان بنت سعيد
ساره وهي تناظرها بقهر وبضحكه شوووي : حرام عليك طيحتي قلبي وانتي يا ريموه متفقة مع مها صح
مها : والله انا عبد مأمور تقولي ريم سوي كذا اسويه حتى لو تقول طبي في النار طبيت خخخخخخخخخ
ريم : وش نسووي ياساره دايم نحس انك تستحين منا وودنا انك تكونين معنا عادي وتصرين مثلنا مثل الأخت
ساره وهي تحس بغصه : والله اني اعتبركم مثل خواتي
ريم وهي تبي تغير الجو : ترى سعووووود يقول ابشرو ريم بس قالت تبون بر لكم الي تبون
روان وهي توقف : ياسلااااااااااااام متفقين ترحون للبر ولا قلتولي
مها : ياخبله هذا بس تخطيطاتنا يالبنات وانتي اخبر بالعيال نخطط ودايم تطيح وجيهنا ولا يقبلون
ريم : لا يابعد عمري المره هذي وافق سعود وبيودينا ان شاءلله
روان : طيب وش رايكم خلونا نروح للإبل ابوي ونجلس ليوم الجمعة
مها : يووه ابل خالي بعيده يمكن يرفضوون
ريم : ما عليك بقول لسعود و أكيد مراح يرفض
ساره وتشوفهم و حبت تدخل وتكون وحدة منهم : اذا قررتوا وكتب الله أن شاءلله ورحنا راح أسوي انا الحلا كله
البنات كلهم : تسلميييييييييييين ياسوري هذا الي نبيه
..............................................
وصلت ساره للبيت
وراحت للمطبخ تشرب ماء في الوقت الي جا سعود لام محمد
ام حمد : هلا وغلا يمه سعود هاه يمه سويت الي قلت لك
سعود : والله يمه منيره مدري وش ألي حادك تهتمين بها سلمي أمرها للحكومة ما ندري وش اصلها وفصلها ويمكن وراها مشكله
ساره وتحس الدنيا تدور فيها ضاق نفسها بكت بكت عمرها بكت نفسها التايه يارب ياعالم بحالي روف بي من انا يمه يبه وينكم تكفون ارحموني تعالوا اخذوني الناس ماترحم ابيكم مهما كان طيبت الي حولي مالي غنى عنكم ليش تركتوني معقوله اهلي ميتين معقوله مالي ابد احد وهي تمسح دموعها
ليش ياسعود وش ذنبي حسبي الله عليك اكرهك من كل قلبي الله لا يسامحك معقوله فيه ناس ماترحم انا لازم اشوف لي حل المفروض ما اصير عاله على ام محمد ..
...............................

وصف لمكان الإبل لخالهم أبو طلال " عباره عن الوايت طبعا هذا للماء للشرب الإبل منه و الاغتسال وما إلى ذلك و مقطورة تتكون من مجلس كبير وغرفه ثانيه لنوم ومطبخ ودورة مياه الله يكرمكم وخيمه كبيره مجلس ثاني لرجاجيل وخيمه ثانيه للحريم وخيمة العمال وخيمه صغيره فيها المطبخ "
وكان جنب مكان خالهم عروق وهي عبارة عن جبال من تراب << أخس يا التوضيح " هذا عاد للتطعيس والبنات يقعدون على رأسها بتشوفونها مع باقي الأحداث " ترقبوا رحلتهم وما يحدث فيها

وبحط البارت اللي بعده عشانكم



الجزء الرابع
كلم سعود خاله سعيد وقاله أنهم راح يروحون لإبله ورحب فيهم خالهم
اتفقوا يمشون الساعة سبع الصباح يوم الأربعاء لان مدت المكان ست ساعات
كل العوائل بسياراتهم ماعدا خالتهم منيره كان إلي يسوق فيهم ماجد
اتفقوا الشباب يجون بيت خالتهم منيره ويمشون من عندها
وصل ماجد وأخذ سيارة عبدالعزيز الفكسار لانها أنسب للبر والتطعيس وركبت ساره وام محمد
وصل تقريبا الكل ماعدا سعود وكان جو عائلي حلو الكل يضحك ويعلق على أشكالهم أغلبهم ما بعد شبع نوم وكانوا البنات هادين بسبب تأثير السهر
أخيرا وصل سعود وابتسامته الي تجذب الواحد نزل : صبااح الخير
الكل الي زعلان على تأخيره والي فرح يوم شافه لكن كان هناك عيون نظرتها له غير كانت نظرات ساره قهر وحقد له من أول ما طاحت عيونها في عيونه وهي تقظم اظافرها.. ليش الكل مخدوع فيك ليش الكل يحبك مو عارفين وش ورى ذا الستار انسان حقير واناني ما يهتم الا في نفسه
سعود من جهته استنكر نظراتها حس بشي غير طبيعي فيها
تركي وهو معصب وفيه نوم : يالله عاد خلونا نتوكل على الله
سعود : اصبر بشوف الكل افطر
رد طلال : يابن الحلال ماله لزوم نمر أي بوفيه ونشتري سندوتش وناكلها على الطريق
مشو مشوارهم للبر وكل سياره وربشتها
نبدا بسيارة ماجد ام محمد تسولف عليهم عن أيام أول.. عن أبل ابوها وكيف طلعاتهم لها وماجد وساره يستمعون لها ويعلقون على كلامها وساره حست ماجد مثل أخوها وارتاحت بالكلام معه لكن تفكيرها يجبرها تفكر في سعود
سيارة سعود كلها ضحك وتعليق على شكل ريم الي نايمه ومالها خلق للسوالف
سيارة تركي العكس صحيح هو الي ماله خلق يسولف ويبي مخده وينوم على طول وامه خايفه وكل شووي تسولف عليه خايفه انه ينام ودانه هات ياتعليق عليه وهو شوي ويكفخها
سيارة خالد يعم فيها الهدوء مها نايمه وام خالد تسبح وتختصر كلامها بكلمه او كلمتين وخالد سارح بأفكاره ويحب يسوق وهو ساكت هاذي عاده متعود عليها عكس خطيبته الي ما تسكت من تروح رحلة وهي تهذر لحد ما يوقفون
سيارة طلال معه ابوه وامه واخته روان واكيد سياره فيها شيبان بتلقون سوالف في قصص الأولين وكيف يختلفون عن عيال الوقت هذا
سيارة عبدالله ومعه فهد سوالف وضحك خاصه ان فهد انسان مرح وملتزم وسوالفه كلها تشرح الصدر كلها تذكير وتأثير بالي حولهم والي يصير وكيف حال شباب ذا الوقت ومن ذا السوالف
وصلوا في تمام الساعة 12 ظهراً
سعود ينادي امة : يمه يمدي نذبح الذبيحة للغداء ولا نخليها بكره
ام سعود : لا يمه حنا جايبين معنا لحم بنسوي عليه الغداء الحين وبكره اذبح يمك ذبيحتك
سعود يحب خشم امه : جعلني ماخلا منك يمه
ام سعود وام تركي ينادون بسرعه يابنات تعالوا ساعدونا
ريم: الحين لو مارين المطعم وجايبين معنا غداء مو أبرك
ام تركي : يابنتي الله يديم النعمة وش ازين من أكلنا أذا توليناه بيدينا يجي له طعم
مها : أنشهد يا خاله خاصه أذا كنتي أنتي ألي طابخته مهوب بنتك دانه الله يعين خلودي اخوي
دانة وهي تحط يدها على خصرها : نعم نعم ياختي طبخي مافيه مثله مهوب مثلك ماتعرفين الا سلق البيض
مها وهي تستفز دانه : طيب ورينا شطارتك
دانه وهي توقف وشوي بتطيح على الأغراض من العجلة : اطلعو برى المطبخ كلكم وأنا الي بطبخ عشان تعرفين أني قدها وقدود
ساره وهي ميته ضحك : اخاف ما نتغدا اليوم
دانه وهي تفتح عيونها وتشووف ساره: حتى انتي ياساره بعد لالا لن أرضى ارجوكم اخرجو برا الخيمه دعوني اعد الغداء
ام سعود وهي تضحك : يمه دانه ترى الشباب واجد وموجبين للغداء لا تهورين يا امك
دانه : لا ياخالتي انا قدها وقدود
الكل طلع من الخيمه وجلست دانه تسوي الغداء بلحالها


مها : ههههههههههههههههههههههههه ههههههههههههه
روان , وريم , وساره يشوفونها ومستغربين ليش تضحك
مها وهي توقف ضحك : يا أغبياء انا ماسويت كذا الا عشان نفتك من تقطيع والكرف خليت دانه تسوي الغداء بخطه جهنميه مني ونتفرغ حنا لمشاهدة الطبيعة ونتمشى 
ريم وهي تمد يدها لمها : كفتس كفتس كفوا يابنت خالتي
ساره : يالظالمه الحين البنية متبهذلة بالمطبخ وانتي تبين بس تتمشين
روان : بروح اساعد دانه وادفعها معنويا وماديا ً
ضحكوا البنات على روان لأنها اصلن ماتعرف شي بالمطبخ
دانه وهي منهمكة بالغداء وتحاول تسوي غدا ما حصلش الكل يتكلم عليه
دخلت عليها روان وبدت تسولف عليها وتسليها والبنت ركبت الغدا وتقطع السلطة وتتفنن فيها
زهقت روان من الجلسة بالمطبخ واستأذنت من دانه وطلعت
خالد جا يمشي لأمه :يمه عندكم ماء بارد الماء الي عندنا حار وانتي تعرفيني ما احب اشرب الا مويه بارده
ام خالد والله ياولدي في المطبخ ثلج روح ما هناك ألا خالاتك
البنات راحن يتمشن وفعلا ام خالد شافت البنات يتمشن توقعت كلهن رايحات
دانه كانت جالسه على الأرض ورافعه كل شعرها لفوق بطريقة مطلعه شكلها خيال وجالسه تقطع ومنهمكة وما انتبهت لشخص الي كان واقف وهو الصدمه الجمته ماقدر ينطق ولا ينبها بوجوده انبهر بجمالها ونعومتها بالصدفة رفعت دانه عيونها وشافت خالد قدامها فتحت فمها وهو حس على نفسه قال أسف وطلع بسرعة
دانه تدري انه خالد عندها صور له بس هو ما عرفها
دانه تكلم نفسها : ياربي مدري شكلي زين أو لا وش بيقول عني الحين

خالد راح لأمه وكان خالاته عندها
ام خالد : هاه يمه لقيت الثلج
خالد وهو يحس بالإحراج : لقيت في المطبخ وحده من البنات وطلعت
ام تركي وهي تضحك : ما عرفت خطيبتك يمه
خالد وكان هالخبر مثل المويه الباردة ألي نكبت عليه وقال في خاطره : ها الملاك لي أنا
ام سعود : تحدوها البنات وقالوا انها ماتعرف تطبخ وطردتهم من المطبخ وقالت والله ما يسويه الا انا اليوم
خالد بدون ما يحس : بيجي أحلا غدا ذقته في حياتي
ضحكوا خالاته:أكيد من يمدح العروس
وهو أنحرج طلعت الكلمة منه بعفويه وستأذن وراح للشباب ونسى المويه والثلج وخطط أنه لأزم يكلمها في الرحلة هذي
سعود كان يراقب البنات وخايف انهن يبعدن : ماجد
ماجد وهو يقلب جواله : سم
سعود : سم الله عدوك روح جيب البنات ابعدن وهن يتمشن
ماجد وهو يتشقق من الضحك : ابشر
طلال وهو عارف حركات ماجد : عليك بهن فحط فيهن لين يعيفن التمشيه بعيد


ماجد جا مسرع للبنات
ريم : الله يعينا جا ماجد لا تفرقن خليكن ترى الحين بيجي مسرع كأنه بيصدمنا
مها : مقدر ياريم تعرفيني مطيوره بنحاش
ساره وهي ميته ضحك : لالا ماجد حليل مراح يسويها
مها : بلاتس ماتعرفينه زين اصبري وشوفي
ماجد عارف أن ساره معهم مابغى يخوفهن : السلااااااااام عليكم
ساره : شفتوا هذاني قلت لكم
ردو البنات وعليكم السلاااام
مها : غريبه مهيب من عادتك
ماجد وهو يدور بعيونه على روان : وش الي غريبه
ريم : قصد مها غريبه انك ماروعتنا اليوم
ماجد وهو تكدر ما شاف روان : أركبن بسرعه بيحطون الغدا وبيفوتنا
ركبوا البنات معه بس بالصدفه شافوا روان جايه يمهم تمشي
ماجد لمحها وابتسم : تمسكوا يابنات زين
مها وريم : الله يستر
ساره : ميته ضحك على أشكالهن
روان انتبهت للسيارة الي جتها مسرعه : هذا ماجدوه الله ياخذه الحين اكيد بيجيني مسرع يبي يخوفني مراح اتحرك اوريه
وفعلا جا ماجد مسرع والبنات يصارخن وهو يفحط فيهن
مها : عمى يعميك اني اعرفك زين وشوله ركبت معك
ريم وهي تصيح : يممممممممممممه الحقي علي
وماجد مستمتع وميت ضحك
ساره الخوف مسيطر عليها بس اشكال البنات تجبرها على الضحك
وصل لروان وهي مثل الجبل ماهمها
مها وهي تصارخ : روان ابعدي بيذبحك اخوي ترى مو صاحي
روان وكانها ماتسمع وهو يدور حولها بعدين وقف
ماجد وهو يرفع نظاراته الشمسية ويطالعها : اركبي
روان بتصرف طفولي : مابي
رجعت روان للمخيم تمشي وماجد يمشي بشويش معها اذا وقفت وقف واذا مشت مشى
انحرجت روان والبنات ميتات ضحك على شكلها
ماجد : قلت لك اركبي
فتحت روان الباب ودفت ريم وجلست والصدفه انها ورى ماجد من الضيقه ما نتبهت
ريم : شوي شوي ترى انا مو ماجد 
روان وتصك على اسنانها ولا ردت
عدل ماجد المرايه الاماميه وهي رفعت عيونها للمرايه وشافته وابتسم لها
حست روان بشعور غريب من ابتسامته اول مره تحس بها الإحساس قلبها يدق بسرعه ونفسها يضيق
ماجد كان ناوي يرجع للمخيم بس بما أن روان ركبت معهم قرر يتمشى فيهم
وحط قصيدة لحمد السعيد وطول عليها
" أحب الغرور وخص لجا على المملوح
يجيله طعم ثاني وانا الي مجربها
أنا لي حبيب من غروره شبعت جروح
وعشقت الجروح الي غرورها سبايبها
احبه ولع ويحقله الدلع مسموح "
رفعت عيونها حست كأنها المقصودة بالقصيدة وتلاقت نظارتها معه وغمز لها وهي صدت على الدريشه وهو ضحك بصوت عالي
مها : بسم الله عليك وش فيك
ساره الوحيدة الي منتبه لماجد وروان
ماجد : ولا شي تذكرت موقف
ريم : تكفى ماجد وشو الموقف
روان وهي صاده للدريشه تتفرج
ماجد وهو يراقب روان مع المرايه : مره كنت بالسوق مع واحد من خوياي يحب يغازل بشكل فضيع المهم تجي ذيك البنت مشيتها وشكلها يعق الطير من السما وصديقي الله باليه بالمغازل وهو الزين في جهة وهو في جهة قال لها ياهووه اروح وطي التفت عليه قالت الظاهر مافي بيتكم مرايات الي مثل وجهك ما يغازل فمت ضحك عليه
ضحكوا كلهم حتى روان
ورجعوا عشان يتغدون من غدا دانه
وبسرعة راحوا البنات يساعدون دانه في تقديم الغدا وفعلا أثبتت دانه أنها طباخه ماهره بشهادة الحريم والشباب كلهم وأولهم خالد
كان الجو العصر روعه بمعنى الكلمة حايط بمخيمهم رمال بكل جهة والعشب بمختلف أنواعه متفرق في الأرض صاير اندماج رهيب بين لون الرمال واللون الأخضر والبنفسج والأصفر و الأبيض أزهار بريه صغيره "خزامى –نوير "
و أنواع من الطيور البرية تحلق في السماء وتعلن عن حريتها المطلقة في الفضا
الحريم فارشين فرشه على الرمل وحاطين القهوه والشاهي والتمر و الأقط
تعجبت ساره منه وعجبها طعمه سئلت سؤال عام للكل كيف يسونه
ام تركي : أسئلي ام طلال عنه يا ساره
ام طلال وهي ترشف من القهوة العربية: يبيله شرح طوويل
البنات كلهم تحمسوا وكلهم أنظارهم على ام طلال بمعنى كملي
ام طلال : اذا بقولكم كيف طريقة المضير او الاقط لازم اقولكم كيف نروب اللبن عشان نطبخه ويصير اقط
ساره : قولي يا أم طلال معك
ام طلال ببتسامة :طيب على شرط
روان وهي متحمسه : وشو الشرط
ام طلال : بكره تخضون اللبن وتسوونه
دانه بدهشه : كيف
ام طلال بهدوء : هذا انتو تعلمون كيف تسون كبشتوني وهو من صنع الغرب وما هتميتو كيف تسوون الاقط او اللبن
روان :خخخخخخخخخخخخخخخ اسمه يمه كابتشينو
ريم : روان وجع خلي خالتي ام طلال تكمل
ام طلال وبدت تشرح طريقة اللبن : في البداية اذا حلبتوا حليب الغنم جيبو المصفاة وصفو البن يعني اشخلوه عشان يروح الي في الحليب من شعر ومن أي شي عالق فيه وبعدين حطوه في قدر وفي مكان لا بارد ولا حار اذا شفتوا الحيب بدى يصير كنه مقطع جيبوا الخضاضه وحطوه فيها لين يطلع الزبده ويصفى اللبن بعدين اخذو الزبده منه اذا تبون تحططون اللبن في الثلاجه يبرد او اذا كنتو تبون تسونه اقط له طريقه بعد
البنات وهم متحمسين مع ام طلال : أي اكيد نبي نعرف طريقة الاقط
ام طلال وهي تاخذ لها تمره وتكمل باقي فنجالها : ان شاءلله يا بناتي
اول شي تجيبون قدر وتحطون فيه اللبن وتخلونه على النار وتقصرون عليها يعني تجي النار وسط لا قصيره ولا طويله ويحترق بسرعه وبعدين ينزل الحليب لاسفل القدر ويجي الماء اعلى القدر جيبو ملعقه وشيلو الماء الي في اعلى القدر لين مايبقى ولا قطرة ماء وحركوه كل شوي لحد ما يصير كثيف وشيلوه من على النار عاد كيفكم تبون تسونه اصابع او مبثوث الي تبون
ام تركي وهي متحمسه مع البنات وتضحك : تدرون وش حلانا يابنات اذا سيرو علينا خوياتنا ولا جيرانا
البنات بفم واحد : وشو
ام تركي : شفتو الاقط وهو تونا منزلينه من على النار وهو كثيف نجيب يمكن خمس ملاعق كبارو ناخذ بعد من زبدة اللبن تقريبا ثلاث ملاعق ونحطها بقدر صغير ونحركها مع بعض على النار ثم نجيب التمر ونخلطه سوا يطلع حلا نقدمه مع القهوه
دانه : لازم نسويه نجرب حلا الأولين
مها وهي تطنز على دانه : الحين من وين لنا الاقط الي توه مطلع من على النار ومن وين لنا الزبده
دانه وهي تناظرها ببلاهه : من الغنم
روان :خخخخخخخخخخخخخخ غنم امي حول الرياض وش يجيبها بكره
قاموا الحريم لأن الشمس بدت تغيب وتعلن عن رحيلها
ام محمد : يلا يا بنات الحين الأبل تبي تجي من المرعى تشرب ماء من الوايت
ابعدن عن طريقها قبل تهبدكن

اقبلت عليهم الابل منها المغاتير والمجاهيم البعير والناقه والحوير اشكالها ترد الروح للبدوي الأصيل تتسابق تبي توصل للما الي انحرمت منه من الصباح للمسا وأشكال الحوير وهو يركض ورى امه يستدعي الضحك والتعجب

البنات جالسين على الدكه الي في المقطوره ويتفرجون على اشكال الابل وهي تشرب من الماء و كل وحده من هن تستحل لها ناقه
ريم : انا الي لونها ابيض
دانه : انا ذيك السودا الي معاها حوير صغير
مها : هههههههههههههههه دانه طماعة تبي الناقة وحويرها
روان وهي تحط يدها على خصرها : ياسلام ياسلام الحين كلكم استحليتوا ابلنا يلا بس هذي كلها لي
ساره ميته ضحك على روان وكأنها صدقت الموضوع
ريم : مالت عليك يالبخيله حتى في احلامنا تخربين علينا
مها وهي اول مره تصير جديه : تصدقون يا بنات ان هذي الحيوانات الي قدامنا أنها تسام بالملايين
ساره : مو معقولة وليش عاد
ريم : صدق وش تتوقعون سبب ارتفاع أسعارها
دانه : طيب منتبهين لها ولا انتبهتوا اذا قالو حصان اصيل ويسام بذاك المبلغ وقدره
مها : يا دانوه الحصان على الأقل اذا ساموه بملغ وقدره يمكن لأنه يسبق في سباقات بس الابل انا الى الآن حايرة ليش كل هالمبالغ تصرف عليها
روان : بنات شوفوا أبوي كيف يحلب الناقة

سعيد ابو طلال رجل خيوط الشيب يتخلل لحيته التي صارت تنعم باللون الأبيض ويكاد ينعدم اللون الأسود فيها ويتحلى وجه بسمارة الرجل العربي وبعقده بين حاجبيه كان مندمج بحلب الناقة وبمهاره عاليه تنم أنها ليست المره الأولى التي يحلب فيها ابتسم يوم شاف البنات يراقبنه

روان : بنات وش رايكم نشوي اليوم في لليل العجز مايبن غير الغبوق
" حليب الإبل "
مها وهي تنط : ايوى فكره حلوه
دانه : انا مراح اسوي شي كفايه الغدا
ساره : خلاص الشغل يتوزع بينا ودانه ترتاح
ريم : انا الي بوزع الشغل روان تقطع الدجاج هي ومها ويتبلونه وانا وساره نشب علي الفحم اوكي
دانه : اممممم خلاص انا بسوي سلطه هذا كرم مني
روان : انتشروا كل وحده لشغلها
وبصدفه كان ماجد يمشي وسمع كلامهن .. راح للشباب وهو ناوي على البنات بنيه
ماجد : شباب تكفون طلبتكم لا تردوني خص انت ياسعود تراك بتخرب علينا
عبدالله : ابشر ماطلبت امر انت وسعود خله علي
ماجد : انا مريت بصدفه وسمعت البنات متفقات يبن يشون خلوهن يخلصن ونسوي خطه لين ناخذه تكفون
في البدايه عارض سعود وفهد لين اقنعوهم العيال يبون يستانسون
روان : يم يم الله علي شكل الدجاج وهو متبل يجنن وشلون اذا شويناه
مها : انتي كلتيه بعيونك وحنا مابعد شويناه
ساره : ريم لاتحرقين نفسك اذا ماعرفتي نادي واحد من خوانك يشعلها
ريم : ههههههههه لا تخافين انا قدها وقدود علي قولت دانه
بعد نص ساعه تجمعوا البنات وريم قاعده تقلب الشوي والسلطه كانت جاهزه
العيال متجمعين ويناظرون البنات من بعيد وكلهم متحمسين وحمسوا معهم فهد وسعود
ماجد : ريحت الشوي واصلتني هاه كلكم فهمتو الخطه ولا أنا بس ألي متحمس
ام محمد ماجاها نوم وراحت تتوضآ وتصلي لها ركعتين: ماجد و أنا خالتك وش انت متحمس له عسي منت ناوي تروع روان حبيبي ترا انا مارضى عليها
ارتبك ماجد خاف خالته تخرب خطته
واسعفه طلال يوم قال : ياخالتي شباب ودهم يروحون بالبنات يصيدون بهن جرابيع
ام محمد : الله يهديكم ويصلحكم يارب وراحت وخلتهم
كان الجو مره روعه شكل النجوم في السما خاصه في البر يكون شكلها خيال والقمر وهدوء غير طبيعي معطي شكل حميميه وخاصه بجمعت البنات
دانه :مايحتاج نقعد داخل تعالوا شوفوا الجو
فقرروا البنات انهم يجيبون فرشه عشان يتعشون برا دانه : ساره تعالي معي المطبخ عشان نجيب الكاتشب والمايونيز روان : بنات وش ذا الي يتحرك من بعيد انا خايفه مره ساره : تكفين ترا انا خوافه مره لا يكون من مقالبك الله يوفقك ريم : يمممممممممممممممممممممه بنات انحاشو شكله جني مها : ريم تكفون انا ماقدر امشي وترجع ريم وتمسكها وتركض ماجد وهو ميت ضحك : البنات صدقوا ان فيه جني ههههههههههههههههههههههههه ههههههههه
عبدالله وهو متحمس وطلال : بسررعه شيلوا الصينيه قبل يرجعون البنات
ساره : يابنات يمكن مو جني يمكن ناقه او شي
ريم : لا شكله يرووع وربي جني يمه
روان : ياربي شوينا وش نسووي
مها وهي تفز : برووح اقووم امي او اشوف العيال

ام محمد سمعت أصواتهم وتجي تمشي لمهم :عسى ماشر اصواتكم واصلتني وانا في فراشي
ريم وشوي بتصيح : يمه منيره كنا نشوي وجا يمنا جني
ام محمد كأنها فهمت السالفه : تعالوا معي نشوف وين الجني
ساره : وين نروح مقدر تكفين عمتي لا تخلينا نروح
ام محمد وهي تدري انهم الشباب : تعلوا الجن اضعف مخلوقات الله اذا قريتوا اية الكرسي اختفوا
كل وحده من البنات تقرا المعوذات و آية الكرسي
راحوا البنات وام محمد لمكانهم ومالقو شويهم
مها بصرخه : الجني اخذ شوينا
ام محمد وهي تضحك : والله الي يمكن اخذ شويكم العيال اشوفهم يراقبونكن
روان بقهر : هين قسم بالله مانعديها لهم وانا بنت ابوي
ريم : الله ياخذهم ولا بقوا لنا شي بتصل على سعود
ساره سمعت طاري سعود خذت نفسها وراحت للمقطوره عشان تنام
مها : تكفين ريم اتصلي على عبدالله
ريم وتناظر مها بنظرة تقدرون تسمونها نظرة استهزاء : حنا وين وانتي وين
مها وتفشلت وتقصر صوتها لا تسمعها روان : يا أختي أحبه و اشتقت اسمع صوته
ريم : سعووووووووووووود
سعود وشاف رقم ريم ويناظر الشباب: وقفوا لا تأكلون
عبدالله وكأنه درى ان ريم الي اتصلت : عزالله ما ذقنا الشوي اليوم
طلال وبقهر واضح : ياخي ترد رايك لحريم خلها تولي
فهد : أنا وشوله طعت شوركم ولا ترى مايجوز طريقتنا
تركي وهو يضحك : يابن الحلال الحين بنستسمح منهم ومهوب صاير حرام بأذن الله
سعود : هلا وغلا بأحلا ريم بالوجود
ريم : سعود ليش كذا حرام عليكم
سعود وهو يتكلم بهدوء : فديت الزعلان وشو الي حرام
ريم وهي تتنهد : طيب ليش ماقلتو لنا انكم تبون كان قسمنا لكم بس تاخذونه كله يرضيك يروح تعبنا على الفاضي
سعود وكأنه يكلم طفل صغير : ريوومه فديت عيونك الحين حنا بقينا لكم بس يوم خذناه نبي نلعب عليكم ولا انتو ماتهونون علي
ريم وهي تدلع عليه : لا ما ارضى لازم تصيد بنا جرابيع عشان ارضى
ومها فزت وبغت تطيح على النار من الحماس : يالبى والله قلبتس يا ريم أي تكفين خليهم يصيدون بنا
روان وتحس بدقات قلبها تزيد وتكلم نفسها يارب ماجد ما يروح معنا
سعووود : ابشري من عيوني انتي تامرين أمر
سعود وهو يكلم عبدالله روح ودي باقي الشوي للبنات
عبدالله وهو منقهر شووي : ابشر ولا يهمك
راح عبدالله للبنات
التفت تركي للسعود : كنك بتجربع بلبنات
سعود وهو يضحك : وش اسووي حكم الظالم ماجد لازم تروح معنا عشان تطرد الجرابيع لو نخليها على البنات رجعنا ماصيدنا
ضحكو العيال كلهم
تركي : والله انا بروح معكم مانيب جالس بلحالي
طلال والله ودي اخاويكم بس احس بصداع فضيع وبرقد
فهد : والله انا بعد برقد ماتعودت اسهر ويا سعود استسمح لنا من البنات
سعوود :ولا يهمك يا ابو سعيد ان شاءلله ان مايزعلون منك انت بالذات


عبدالله وهو يجي شايبل الصينيه : اس اس اس السلاااااااااام عليكم
مها شووي بتحفر حفره تحتها وتنخش وتقرص ريم
ريم وهي توجع من قرصة مها تصرخ : اااااي وا وا وا عليكم السلاااااااام
عبدالله ويلتفت على البنات : شحالكم يابنات
دانه اجرى وحده فيهم : بخير الله يسلمك وشحالك انت
عبدالله وهو يوزع نظره بينهم : الحين ليش مارد الا دانه وين السان الباقيات
روان وهي تحنحن : بخير عبودي شلونك انت
عبدالله وهو يناظر روان وفيه ضحكه : الحين يارواونه طولي 170 ما مليت عينك تقولين لي عبودي
ريم بصوت عالي :هههههههههههههههههههههههه� �هههه
عبدالله وهو يفز ويمسك يدين ريم ويلفها على ورى : يلا الحين اضحكي قوى
ريم : آآآآآآآآآآي مها الفزعه
مها تكلم نفسها الله ياخذك ياريم جعلك العقرب الي تقرصك
عبدالله وهو يناظر مها ومها شوي بيغمى عليها : تعالي مهاوي وجربي وش اسوي بك
كلمة مهاوي بغت تطيرعقل مها تتكلم بشويش : ياربي بموووت انا
عبدالله وهو يستفز مها : يالله خويتك تطلب الفزعه افزعي لها
مها تكلم نفسها وتبي تتنفس: انت ناوي تذبحني اليوم حرام عليك ارحمني
ريم : مالت عليتس من صديقه اني داريه ما وراتس فزعه
ويجي سعود ويمسك عبدالله من وراه ويكتفه : تعالي ريم اخذي حقك منه
ريم : فديتك وفديت التراب الي تمشي عليها
مها وهي تكلم ريم بصوت قصير : شوي شوي عليه ترى ما ارضى نسمة الهوا تجيه
ريم وهي تلتفت لمها وتكلمها بصوت واطي : مها فقدتك انتي والحب
مها : يالله يارب جعلتس تذوقينه وتعذبين بعذابه
ريم تكلم مها بشويش : بسم الله علي
ريم تعلي صوتها : انا اصلن رحووم وطبعي دلوعه ولان بعض الناس قالت لا تسوين له شي رحمته فكه ياسعود
عبدالله: اكيد روان الي قالته اعرفها تحبني
مها وتحس بقهر وتفرك ارجولها بالارض وتمشي وتخليهم
ريم حست بصديقتها وراحت وراها وما بقى غير روان ودانه وسعود وعبدالله ويجيهم ماجد طاير : من الي يحبك انت ماعنده نظر
عبدالله وهو يضحك : روان
ماجد وحس بصدمه قويه التفت على روان وناظرها يبي يشوف ردة فعلها
روان : من زينك احبك حبتك القراده " ماتدري ليش قالت هل تبرير لماجد خافت يفهم غلط يمكن مع الايام يتضح كل شي "
ماجد وهو شوي ويتشقق من الوناسه : متى نروح نصيد جرابيع
سعود : اصبر شووي ريم ومها راح يجون
ماجد : لا تنسون ساره نادوها بعد ترى صارت منا
سعود التفت على ماجد : من قال انها منا بعد كم يوم اذا رجعنا بنسلمها للشرطه وهم يتكفلون بالأمر
دانه : حرام عليك سعود ليش كذا
سعود وهو يبرر موقفه : يادانه حنا ماندري وش البنت مسويه يمكن البنت خربانه
روان وتبكي : حرام عليكم ساره خوش بنيه ليش تفترضون انها يمكن تكون صايعه
ماجد وانقهر من سعود ولان روان تبكي : ساره بنت محترمه حتى لو افقدت ذاكرتها شوف اخلاقها مانسمع صوتها ومتستره مو معقوله تكون بنت صايعه وان شاءلله مراح نسلمها للشرطه وانا بنفسي راح ابحث عن اهلها
روان وتناظر ماجد الي كبر في عينها
ساره كل يوم يزيد جرحها كلامهم كله في اذانها حطت ايدينها على فمها وطلعت راحت تمشي تبي تصرخ باعلى صوتها ماتبي احد يسمعها تبي تطلع العبره المخنوقه تبي تبكي وتبكي ولا احد يقولها وقفي آآآآآآآآآآآآآه يارب ارحمني يارب ارحمني يارب لك ابث همي يارب لك اشكو يارب ساعدني
سمعو صياح ريم ركضو الشباب يشوفون وش صاير